الحياة واسعة لدرجة أننا بنتوه جواها
وتتوه الخطوة فى أرض مش صلبة
ووسط المشاكل ودوامة الحياة
بنشوف روحنا تايهة مش عارفه لاى جسد حتروح
ويفضل الجسد الأصلى كجثة متحركة بملامح متجمدة وابتسامة باهته زى الاموات الأحياء
ويفضل الواحد يتخنق ويتخنق وهو على الأرض جسد متحرك بلا روح
مين فينا مضعش وسط دوامة الحياة
بس الصعب لما يموت القلب وهو عايش بيدق
الإصعب لما تخاف ومتلاقيش الامان
ولما تلاقى نفسك محتاج ايد تديك الحنان
لما تلاقى اللى يوعد وانت تصدقه ويخلف
لما تلاقى اللى عليه انت بتهون
هى كلمة مقصدش سهلة
والا كلمة معلش سهلة
حيعملوا ايه فى جرح انسان
صعب تفضل عامل نفسك قوى وانت ضعيف
والاصعب لما دموعك تكون ماسكها علشان متنزلش لما قلبك هو اللى يبكى
الاصعب لما تلاقى ناس مش حاسة بوجعك
الاصعب لما محدش يقدر عملت ايه علشانه وينكر
مين فينا مضحاش
القلب من كتر الوجع حاسس دقاته كأنها سيف بتحوله لحتت صغيره وان الضلوع سجن ليه
فجأة الدنيا بتسود وتحس بخنقة والدتي بتقفل عليك كأنها تابوت
حتى شعاع النور
ليل وسط النهار
وتلاقى قسوة من ناس وعدم احساس
مين فينا مش تايه ومفيهوش اوجاع
مين مش محتاج يلاقى نفسه
مين مش محتاج امان
مين مش محتاج يضحك ويعيش
ومين فينا مش عاوز يتكلم ويصرخ وفجأة نفتكر ان السكوت افضل واكتر اخلاص لاحاسيسنا الموجوعة فنسكت ونلتزم الهدوء
مين مكدبش وقال انه ديما بخير
فى منا كتير مات الكلام جواه ومبقاش عارف الحروف هى اللى ماتت والا هو اللى مات
لو فاكرين ان الضحكة اللى مش بتفارق وشنا أننا مرتاحين
ده لو اتكلمنا مره من قلبنا راح تغرق دموعنا الأرض
هو سهل كده ان قلوبنا تبكى والا مشاعرنا تموت
مين محاولش يهرب ويهرب
بيجى وقت نبكى ونبكى وبنحاول نتماسك علشان مفيش حد يفهمنا
صبرنا كتير على دموعنا ومسكناها كتير وبيجى وقت نفسها تفلت وتنزل
حنسكت ونسكت ونفضل نسكت لحد ماتخلص اوجعانا او نخلص احنا
كتير منا ضحية وكتير عايش دور الضحية
وفى الآخر هو احنا بنطلب المستحيل
احنا بنحلم حلم بسيط ان اليوم يخلص من غير وجع وألم
تعليقات
إرسال تعليق